Love Is Never Gone

Magtatrabaho si Teo sa Morocco para mabigyan ng magandang buhay ang kaniyang pamilya, ngunit mabibiktima lang siya ng isang tusong magnanakaw, hindi lang isa kundi dalawang beses. Pagpaplanuhan ni Yana at ng mga kaibigan ang kanilang pag-alis sa sindikatong ginagawa silang con artist. Sa patuloy na pagku-krus ng kanilang landas, mabubuo ang pag-iibigan nina Teo at Yana.

Isasagawa ni Yana at ng kaniyang mga kasama ang kanilang planong nakawan ang isang mayamang sheikh at takasan ang kanilang amo. Matapos malaman ang mga lihim ni Yana, masasangkot sa gulo at maaaresto si Teo. Pagkalipas ng ilang taon, makakalaya si Teo at magsisimulang muli sa Pilipinas. Ngunit kaakibat ng isang magandang oportunidad, makikilala ni Teo ang isang babaeng kamukhang-kamukha ni Yana.

Magsisimula nang mamasukan si Teo kay Ace at mapagtatanto niyang higit na kumplikado ang paninilbihan sa mayaman at makapangyarihang pamilya Verona. Kasabay nito, palihim niyang iimbestigahan si Gem-na pinaniniwalaan niyang si Yana-hanggang sa isang mahalagang detalye ang kaniyang mapapansin. Samantala, lingid sa kaalaman ni Teo, walang sinuman ang basta-basta makakalusot sa pamilyang ito.

Lilitaw ang mga lamat sa pagsasama nina Ace at Gem matapos masisante si Teo. Agad na makakabalik sa trabaho si Teo, ngunit hindi magtatagal, matutuklasan ni Divino ang kaso nito sa Morroco. May isang hindi inaasahang magtatanggol kay Teo, habang patuloy na igigiit ni Gem ang pagkadismaya rito. Hindi pa rin mawawala ang pagdududa ni Teo kaya hahanap siya ng paraan upang mahubad ang maskara ni Gem.

Mayayanig si Teo matapos masaksihan ang brutal na pananakit ni Ace kay Gem. Habang pilit niyang kinukumpirma kung si Gem nga ang nasa likod ng kaniyang paglaya sa Morocco, unti-unti niyang matutuklasan ang mga madidilim na lihim ng pamilya Verona. Samantala, nang malaman na hindi na matutuloy ang kanilang paglipat sa US, palihim nang ihahanda ni Gem ang kaniyang mga susunod na hakbang.

Iimbestigahan ni Teo ang trafficking network ng mga Verona at ang posibleng kaugnayan nito sa kaso ng kaniyang ina. Hindi inaasahang makukuha ni Larajean ang loob ni Katarina-kapalit ang kapahamakan ni Gem. Aabot na sa sukdulan ang pagiging seloso at marahas ni Ace, kaya't hihikayatin ni Teo si Gem na tumakas mula sa mga Verona bago pa mahuli ang lahat.