由積遜斯高﹙《失戀精華遊》﹚、艾希姆斯﹙《醉爆伴郎團》系列﹚及金像影后蘇珊莎朗頓主演，《Jeff Who Lives At Home》講述一條宅男追尋生命意義嘅出位故事。成三十歲人仲渾渾噩噩嘅傑夫，為免俾老母同大佬日哦夜哦，至鍾意暱埋喺屋企地牢做宅男，一家三口關係疏離到唔恨。直至一日傑夫再次踏足外界，經歷一連串符碌事件之後，終於俾佢搵到一直想要嘅答案，而全家人鬱埋多年嘅心結，亦將喺呢部被譽為「影壇上趣味、細膩、感人珍品之作」中爆笑解開。